Ikipe ya Rayon Sports WFC, yanganyije na Bugesera WFC ibitego 2-2 ku mukino yahereweho igikombe cya shampiyona y’Icyiciro cya mbere y’Abagore, mu gihe ES. Mutunda WFC yo yatsinzwe na Police WFC igitego 1-0 biyihesha kumanuka mu cyiciro cya Kabiri.
Kuri iki cyumweru, ni bwo hasojwe shampiyona y’Icyiciro cya mbere y’umupira w’amaguru mu Bagore. Mu mikino itatu yabaye, ibiri ni yo yari ifite igisobanuro kurusha undi umwe wanatangiweho igikombe cya shampiyona cyegukanywe na Rayon Sports WFC.
Iyi kipe yo mu Nzove, yanganyije na Bugesera WFC ibitego 2-2 ariko ihita ishyikirizwa igikombe cya shampiyona yari yaregukanye muri uyu mwaka w’imikino 2024-25.
Kuri Tapis rouge i Nyamirambo, Forever WFC yari yakiriye APR WFC, mu mukino wari ufite igisobanuro kinini, cyane ko washoboraga gutanga ikipe imwe muri izi imanuka mu cyiciro cya Kabiri.
Forever WFC iyobowe na Hon. Mukanoheri Saidat, yari nziza muri uyu mukino, yatsinze APR WFC itozwa na Itangishaka Blaise ibitego 4-1 ariko izi kipe zombi ziguma mu cyiciro cya mbere kubera ko ES. Mutunda yari yatsinzwe na Police WFC igitego 1-0.
Gutsindwa kwa Mutunda, kwatumye igumana amanota 20 ihita imanukana na Fatima WFC yamanukanye amanota 10 mu mikino 22 ikinwa. Ikipe y’Ingabo yo yasoje shampiyona ku mwanya wa 10 n’amanota 21 mu gihe Forever yasoje ku wa cyenda n’amanota 22.
Ikipe ebyiri zizasimbura izamanutse, ni Macuba WFC y’i Nyamasheke na Nyagatare WFC yo mu Akarere ka Nyagatare.
