Ufitinema Clotilde wakiniye amakipe y’abagore muri Shampiyona n’Ikipe y’Igihugu y’u Rwanda, yitabye Imana nyuma y’igihe kinini ahanganye n’uburwayi bwa kanseri.
Kuri uyu wa Kane, tariki ya 20 Ugushyingo 2025, ni bwo Ufitinema wanyuze henshi yivuza uburwayi bwe yaguye mu bitaro bya Kaminuza bya Kigali, CHUK, aho yari amaze iminsi arwariye.
Ubwo yabyaraga bwa mbere mu ntangiriro za 2022 yarabazwe, agira uburwayi budasanzwe nyuma yo kumudoda, ndetse amara iminsi ibiri mu bitaro kugeza tariki ya 14 Mata 2022.
Mu 2024 uburwayi bwe bwafashe indi ntera, yumva atangiye kugira ikibazo cy’isereri iza kenshi, yagana kwa muganga bakamusangana amaraso make.
Yagiye kwivuriza mu bitaro bitandukanye birananirana, asaba ubufasha inshuti n’abavandimwe kujya kwivuriza hanze y’u Rwanda. Minisiteri ya Siporo yamufashije kujya kwivuza mu Buhinde ndetse bigenda neza, agaruka mu Rwanda muri Mata 2025 yarorohewe.
Ufitinima yakiniye amakipe atandukanye ahereye mu mashuri abanza, nyuma akomereza muri Shampiyona y’Icyiciro cya Mbere, muri ES Mutunda WFC mu 2013 kugeza 2018, mu 2019 ajya muri Bugesera WFC nyuma ariko asubira muri ES Mutunda yahozemo anakinira igihe kirekire mbere yo kurwara.
Yahagarariye Ikipe y’Igihugu y’u Rwanda mu marushanwa ya CACAFA ya 2018, atozwa na Kayiranga Baptiste.
Andi marushanwa yakinnye arimo ay’Imirenge Kagame Cup by’umwihariko Umurenge wa Shyogwe, Mamba, Rusatira ndetse na Nyarubaka.
