Kimwe mu byaranze imikino y’umunsi wa Gatandatu wa shampiyona y’Icyiciro cya Mbere y’Umupira w’Amaguru w’Abagore, ni ukunyagirwa kwa AS Kigali WFC na Police WFC yayitsinze ibitego 6-2.
Kuri iki Cyumweru, tariki ya 23 Ugushyingo 2025 ni bwo hasojwe imikino y’umunsi wa Gatandatu wa shampiyona y’Icyiciro cya Mbere y’Umupira w’Amaguru w’Abagore. Umukino watunguye benshi, ni uwabereye kuri Kigali Pelé Stadium Saa Sita z’amanywa.
AS Kigali WFC itozwa na Mukamusonera Théogenie usanzwe unungirije mu Amavubi y’Abagore, yatsindiwe ku kibuga cya yo na Police WFC ibitego 6-2.
Ikipe y’Abashinzwe Umutekano yatsindiwe na Grace (1), Elica (2), Rukia (2), Nicole (1) mu gihe iterwa inkunga n’Umujyi wa Kigali yatsindiwe na Nadine watsinze byombi.
Mu mikino itandatu ya shampiyona imaze gukinwa, nta ntsinzi n’imwe AS Kigali WFC irabona. Imaze gutsindwa itatu inanganya indi itatu. Bivuga ngo ifite amanota atatu kuri 18 amaze gukinirwa.
Police WFC iracyayoboye urutonde rwa shampiyona n’amanoya yose 18 mu mikino itandatu imaze gukinwa.
Ibyavuye mu yindi mikino yabaye:
- Nyagatare WFC 0-2 APR FC
- Forever WFC 0-3 Inyemera WFC
- Kamonyi WFC 2-0 Muhazi WFC
- Macuba WFC 3-3 Indahangarwa WFC
- Bugesera WFC 0-2 Rayon Sports WFC
