APR WFC yatsinzwe urubanza yarezwemo na Ihirwe Régine wari wayireze, itegekwa kumurekura akerekeza muri Rayon Sports aherutse gushyirira umukono ku masezerano.
Ku wa 28 Ugushyingo 2022, ni bwo APR FC yagiranye amasezerano n’umuryango wa Ihirwe Régine bakunze kwita Queen, bemeranya ko iyi kipe izamufasha kuzamura impano no kumurihira amashuri mu gihe cy’imyaka itanu.
Mu gihe ayo masezerano atari yakageze ku musozo, Ihirwe w’imyaka 19 yasinye andi y’imyaka ibiri muri Rayon Sports WFC, yarimo yitegura imikino ya CAF Women Champions League.
Gusa ntabwo yari yemerewe gukina kuko APR WFC yari yaranze kumuha ibaruwa imwemerera kujya mu yindi kipe.
Uyu mukinnyi yahise yandikira Ishyirahamwe ry’Umupira w’Amaguru mu Rwanda (FERWAFA), asaba ko yahabwa uburenganzira bwe akajya mu ikipe yahisemo, ashingiye ku kuba amasezerano yasinyiwe n’ababyeyi nta gaciro agifite.
Tariki ya 7 Ugushyingo, Komisiyo y’Amategeko n’Imiyoborere muri FERWAFA
yarateranye yumva impande zombi, Ihirwe yisobanura ku kirego yatanze ndetse na APR WFC iriregura.
Iyi komisiyo yasanze Ihirwe yarareze asaba ko yahabwa ibaruwa isaba kurekurwa kuko yagejeje imyaka y’ubukure, akaba mbere yari yarasinyiwe n’ababyeyi be.
Iyi akaba atari impamvu yatuma ahabwa iyo baruwa, ahubwo azayihabwa hashingiwe ku biteganywa mu ngingo ya 18.1 y’Amategeko ya FIFA arebana n’uko abakinnyi bahindura amakipe.
Iyi ngingo ivuga ko “Umukinnyi uri munsi y’imyaka 18 ashobora gusinya amasezerano mu ikipe ariko akaba atarengeje imyaka itatu.”
Ihirwe yari mu bakinnyi APR WFC yakinishaga mu marushanwa yayo, ndetse ikanabafasha gukomeza amashuri muri Petit Séminaire Baptiste.
